CONVENIO DEPUTACIÓN CORUÑA

O 5 de marzo de 2020 o Presidente da Deputación da Coruña, Valentín González Formoso, visitaba o Museo Fernando Blanco e o IES Fernando Blanco de Cee, comprometendo o apoio do ente provincial para manter o legado de Fernando Blanco de Lema. Concretamente asegurou que na próxima modificación de crédito a Deputación fará unha aportación extraordinaria de 18.000 euros para suplir a perda dun patrocinio importante por parte da Fundación, sendo así o obxectivo fundamental colaborar no mantemento e funcionamento do Museo neste periodo de transición.

A Deputación Provincial da Coruña aprobou no pleno do venres 26 de marzo de 2021 o convenio coa Fundación Fernando Blanco polo que a institución provincial achegará a cantidade de 18.000 euros para colaborar no sostemento dos gastos de persoal e funcionamento do museo da entidade durante o pasado ano 2020. Esta cantidade supón arredor do 50% dos gastos anuais de funcionamento do Museo Fernando Blanco. O resto dos fondos son achegados polo Concello de Cee. Tal como comprometeu o presidente provincial, Valentín González na visita ao Museo Fernando Blanco do ano pasado, a Deputación destinará estes fondos “a manter o gran legado cultural e educativo que atesoura esta centenaria entidade e que permitiu que a vila de Cee contara a finais do século XIX cos centros educativos gratuítos máis avanzados da época”.